Është një procedurë shumë e parapëlqyer nga ana estetike sidomos në dekadën e fundit. Këtë trajtim e preferojnë pacientet që kanë dëshirë për të patur dhëmbë sa më të bardhë edhe pa patur dekolorime të theksuara apo pacientë që kanë ndryshime të moderuara në ngjyrën e dhëmbëve. Pacientët e grupit të dytë janë ata që kanë një problem të vërtetë estetik prej dhëmbëve që kanë ndryshuar ngjyrë. Ndryshimi i ngjyrës vjen si rezultat i gjenetikës, moshës së avancuar, cilësisë së smaltit (karakteristikë individuale), përdorimit të medikamentve specifike ku mund të përmendim antibiotiket, apo pije me ngjyrë që ndikojnë në tjetërsimin e bardhësisë së dhëmbëve.

Lëndët që përdoren për zbardhim janë: Carbamide Peroxide dhe Hydrogen Peroxide( ujë i oksigjenuar). Këto dy lëndë kanë aftësinë (cilësinë) të kalojnë lirshëm nëpërmjet shtresave të dhëmbit (zmalti, dentina) dhe përhapen në gjithë pjesët e dhëmbit. Këto Perokside (Carbamide dhe Hydrogen peroxide) shpërbëhen në radikale oksigjeni, të cilat hyjnë ndërmjet prizmave të zmaltit (shtresa e jashtme e dhëmbit), duke shpërndarë (asgjesuar) molekulat e ngyrosura që ndikojnë në ngjyrosjen e dhëmbit.
Zbardhimi nuk ndikon në strukturën e dhëmbit, vetëm se ngjyra e brendëshme e dhëmbit bëhet më e (çelët) bardhë.
Agjentët zbardhues copëtohen në molekula më të vogla dhe lëvizin në të gjitha drejtimet brenda dhëmbit. Edhe nëse i gjithë dhëmbi nuk është i mbuluar me zbardhues, ai zbardhet i gjithi.
Studime të shumta shkencor kanë vërtetuar efikasitetin e peroksideve në zbardhimin e dhëmbëve.
Zmalti dhe dentina (dy shtresat e dhëmbit), mbushjet egzistuese dhe porcelani nuk preken, ndikohen apo dëmtohen nga agjentët zbardhues.